Ilios Happening!
INTERVJU: Neste helg er det klart for ny runde med ILIOS i Harstad. Vatn og dramatikk, uvanlege konsertformar og fleire besøk i grottehallen er mellom dei emna som publikum kan sjå fram til i år, meddeler festivalleiar Marianne Beate Kielland. - Vi ønsker at det skal være en happening å komme på konsert. Erfaringen da er at folk blir nysgjerrige – og tåler mer av musikken, seier ho her.

Av Ida Habbestad

Då Ballade vitja festivalen i fjor, vart me positivt overraska over høgt publikumsoppmøte og godt pedagogisk opplegg; der den tilsynelatande komplekse musikken vart rikhaldig formidla av utøvarar så vel som arrangørar.

I 2009 har festivalen fått tittelen ILIOS Happening – og motivasjonen er stadig å nå ut, til fleire.

– De siste årene har det å gjøre musikken tilgjengelig for publikum absolutt vært et av de viktigste satsningene, seier festivalleiar Marianne Beate Kielland, som understrekar at det ikkje er ynskjeleg at satsinga går på bekostninga av nokon seriøsitet.

Hovudpoenget er å gjera det som mange oppfattar som utilgjengeleg kunst lettare å gripa – meir attraktivt å nærma seg.

– I år har vi derfor lagt ekstra vekt på opplevelsesaspektet, seier Kielland

– Tanken er at hver konsert skal ha et element av noe uventet ved seg. Det kan være alt fra at folk tar av seg på bena, og sitter i sokkelesten på puter på gulvet, eller at konserten finner sted i et originalt lokale. Vi ønsker at det skal være en happening å komme på konsert. Erfaringen da er at folk blir nysgjerrige – og tåler mer av musikken.


Hendingar ved vatn

Den etablerte konsertsituasjonen er altså i liten grad tilstades under årets Ilios. Der skal vandrast i byen – etast mat, drikkast på puben, rett og slett takast tydeleg del i festivalen.

Ser ein så vidare frå innpakkinga til innhaldet, finn ein vatnet som ein gjengongar. Først som symbol på festivalplakaten og sidan under konsertar som ”Hendelser ved vann” og ”Thomas Myrmel i det våte element”.

– Det begynte med at Thomas Myrmel (amerikansk komponist og utøvar, red. anm.) ville gjøre noe nede i Grottebadet, som er en svømmehall her i Harstad. Vi vet ærlig talt ikke så mye om forestillingen; Myrmel fikk stor tillit da han var her i fjor, og vi har gitt ham frie tøyler. Men det blir elektroakustisk musikk, og Sunniva Rødland Wettre deltar på harpe sammen med sangeren Anat Spiegel. Og vi vet at de skal bruke selve badebassenget, forklarer Kielland.

– Bassengområdet gav oss ideen om å tenke festivalen i retning av vann. Men det er ikke noe gjennomgående tema, legg ho til.


Fleire bolkar

For noko einsretta tema har dei ikkje på den vesle festivalen som finn stad mellom 29. januar og 1. februar. Snarare fokuserer dei kring hovudområde som festivalen har krinsa kring gjennom fleire år.

Mellom anna er den pedagogiske bolken viktig. Dette året er temaet open form, og frå pianist Else Olsen Storesund har elevar ved Borkenes skole fått tilsendt grafisk notert materiale. Saman med pianisten vil dei arbeida med materialet til veka, og torsdag vert resultatet framført saman med Ensemble Ernst.

Òg elevane ved musikklinja ved Sortland Videregående skole har sin eigen konsert, dette året saman med dansarar frå Harstad Kulturskole. Young Generation er tittel på konserten, der mellom anna Homers Odysse er gjenstand for utforsking.

Vidare er der ein dramatisk linje i programmet. Mellom anna finst står Stravinskij-klassikaren ”Historien om en soldat” på programmet, og likeeins det vokale teatret ”Baghdad Lullabies” med Francis Lynch

– Lynch var i Harstad for fire år siden og hadde en utrolig sterk forestilling. Denne tror jeg kan by på like sterke inntrykk – tematikken er i alle fall aktuell. Vi finner både Bush, Blair i forestillingen, som egentlig tar for seg kvinners rolle i Midtøsten, seier festivalleiaren.


Idealisme og skepsis

Kielland – som òg er songar – er inne i sitt siste år som kunstnarleg leiar for Ilios. Ved endt festival overlet ho stafettpinna til Linda Gjersøe Helseth, som tidlegare har vore produsent i divisjonsmusikken i Harstad.

Kva utfordringar går festivalen vidare i møte?

– Det har jo vært snakket mye om festivalenes usikre fremtid, men Ilios overlever nok så lenge noen vil drive den, på dens premisser. Det er mye idealisme i bildet, med et svært lavt budsjett – det kan nok ikke blir så mye lavere. Til gjengjeld er støtten vi har fra Kulturrådet, kommunen og fylkeskommunen stabil, seier Kielland.

– Så vår evige utfordring er nok å få løsnet på skepsisen folk har til samtidsmusikken, å få vist folk at dette er musikk det kan være verdt å få med seg. Og så håper jeg at vi klarer å opprettholde balansen mellom norsk og utenlandsk deltakelse på utøversiden. Ny musikk-miljøet i Norge er tross alt lite. Så istedenfor å bruke de samme utøverne om og om igjen, mener jeg det er viktig å finne en god variasjon med utøvere fra utlandet – folk som kommer med friske toner.

Ilios 2009 finn stad i Harstad, 29. januar - 1. februar. For fullstendig programinformasjon, sjå denne sida.