Frå underskot til overskot i Olavsfestdagene
Årets festival er gjennomført, og frå Trondheim melder festivalleiinga om om godt besøk. - Vi er sikre på at vi har kontroll på kostnadene i år, seier direktør Randi Wenche Haugen.

Av Ida Habbestad

Etter endt festival kan Olavsfestdagene i dag presentera positive publikumstal. Dei fleste konsertane vart godt besøkte, fleire var utselde, og der er registrert fleire tusen besøkjande på rekkja av gratisarrangement i Nidarosdomen. Totalt er det solgt 34.500 billettar til dei 135 billetterte arrangementa, noko som utgjer ei inntekt for festivalen på 7,9 millionar kroner.

Festivalleinga melder i dag, trass i at rekneskapen ikkje er klar, at dei har eit positivt resultat i vente.

- Vi vet at vi har solgt 34 500 billetter, og det er 1500 flere enn hva vi budsjetterte med. Vi har hatt noen ekstra kostnader, blant annet har det vært avlysninger ved sykdomsforfall, men jeg regner med at overskuddet i billettinntekter dekker dette. Ut over avlysningene har det ikke påløpt noen ekstra kostnader som er uhåndterlige, seier Randi Wenche Haugen til Ballade.

Dermed er det duka for overskot, trur festivaldirektøren.

- Jeg kan ikke gi noen eksakte beløp nå, men vi er sikre på at vi har kontroll på kostnadene i år, og at vi ikke går i underskudd.


Mål om 1,5 millionar i pluss
Nøyaktig kva storleik overskotet vil få, er uvisst. Haugen understrekar at Olavsfestdagane er ei heilårsbedrift, og at budsjettet dei opererer med strekkjer seg fram til utløpet av desember.

- Vi har ikke noe eget festivalregnskap; selve festivalperioden er bare en del av organisasjonen vår. Årsbudsjettet vårt går frem til 31. desember, og det er det resultatet vi har når året er omme som er Olavsfestdagenes endelige, seier Haugen.

Dermed er det først i januar det vert klårt om festivalen når sitt budsjetterte mål om å gå 1, 5 millionar i pluss. I augneblikket er festivalleiinga mest opptekne av publikumsoppsluttinga, og Haugen vonar at denne er direkte resultat av programmeringa.

- Profilendringen og programendringen, hvor vi har spisset festivalen mye mer i retning av den spirituelle dimensjonen, har blitt tatt godt i mot både av tunge fagfolk og av publikum. Det tar jeg som en bekreftelse på av at vi er på god vei, seier Haugen.


Vellukka - med utfordringar
Også i lokalmediene er festivalen godt motteken.

Rett nok påpeikar Adresseavisen i sin leiar 5. august den krevjande øvinga det er å kle rolla som både folkefest og kyrkjefestival. Avisa meiner at Olavsfestdagene framleis har "en tendens til å havne i spagat mellom uttrykksformer som ikke lar seg forene". Konklusjonen deira er uansett at festivalen og arrangementa i all hovudsak har vore vellukka - og at arrangørane "har klart å snu fjorårets nederlag til seier".