Festival utan skjegg
INNLEGG: Guttemusikk, skjegg og hornbriller - eller “Women’s world”?, spør Hilde Bjørkum, direktør for Førdefestivalen
Aftenpostens Joacim Lund skriv i ein kommentar nyleg om overvekta av mannlege musikarar på festivalscenene i Norge. Han har nok delvis rett. Vi reagerer likevel over generaliseringa; slett ikkje alle festivalarrangørar har skjegg, hornbriller og 50 år gamle haldningar, og slett ikkje alle festivalar har 90% mannlege artistar på plakaten!
Førdefestivalen til dømes, ein av Norges knutepunktfestivalar med eit besøkstal på 25000 – 30 000 kvart år, har ei over 20 år lang historie med å booke artistar frå alle verdshjørne, og svært mange av desse er kvinner, eller har kvinneleg frontfigur. Dette året er festivalens hovudfokus “Women’s World”, der framtredande kvinnelege artistar frå heile verda vert gitt scene- og talerom.
Les også: Førdefestivalen ser på damene
Kanskje ein sjanse både for publikum, media og rockefestivalarrangørar til å få justert røyndomsbildet sitt? Det faktum at leiinga i Førdefestivalen består av kvinner er (eller burde ikkje vere) poenget, våre val er bygd på kunnskap, kvalitet og tidsmessige haldningar.
Framstormande kvinner innan folk- og verdsmusikken
Det er eit interessant perspektiv at innan folk- og verdsmusikken har dei kvinnelege artistane formeleg fossa fram dei siste åra, tydelegvis i motsetnad til i andre sjangrar som rock og jazz. Her i landet har sterke damer som Sigrid Moldestad, Unni Løvlid, Synnøve Bjørset og mange fleire skapt seg sine eigne rom og vunne nytt publikum dei siste åra, og dei står i ei rekke av kvinner som har vore sterke førebilete: Kirsten Bråten Berg, Annbjørg Lien og Susanne Lundeng, for å nemne nokre. Faktisk er det slik at det snart er motsatt bekymring når det gjeld rekruttering innan den norske folkemusikken; det er fleire kvinner enn menn som ser ut til å bli framtidas folkemusikarar.
P.S. Og apropos kunnskapslaus debatt: Tema på årets Førdekonferanse som går i samband med festivalen har “Kompetanse i kulturlivet – mytar, meiningar og kunnskap” som tittel – vi inviterer hermed medlemene av guttemusikken, Aftenpostens kommentator og alle andre til deltaking!