Velkomen til Vinterkappleik
Folkemusikk- og folkekunststudentane på Rauland er glade over å kunna invitera store og små til kappleik igjen. Vinterkappleiken har utvikla seg til å verta ein av dei største kappleikane i landet, og byr på tevling i spel, kveding og dans - og ein spanande konsert med Skrekk.

På programmet under Vinterkappleiken finn me mellom anna ein konsert med gruppa Skrekk, som tar for seg nokre av dei dystre og skremmande visene som er å finne innan norsk folkemusikktradisjon: om dystre sjalusidrap, gjenferdshistoriar, skandaler, ran og ulykker. Konserten vert og krydra med innslag av det litt muntre slaget som kan roe sarte sjelar. Visene og slåttane vert framført solistisk og i eigne arrangement. I Skrekk finn me Camilla Granlien (vokal, kontrabass), Tone Juve (vokal, cello), Åse teigland (hardingfele, fele). Det vert kro med dans etter konserten.

På laurdag vert det kappleik heile dagen, med fest og drivande dansespel utover kveldane. I tillegg syner folkekunststudentane på Tre, metall og Tekstil arbeida sine i ei stor utstilling - alt i ei rame av snø og vinter.

Arrangørane ynsker elles alle, store og små, ei kjempeflott helg på Rauland 26. - 27. januar.