Ser fram til granskning

Avgått økonomisjef i Norges Korforbund, Sonja Engen, avviser anklaga om at ho førde årsmøtet bak lyset da 200.000 kroner vart overført frå forbundet til Barents Internasjonale Korfestival.

22.09.2009 | Av: Ida Habbestad

Av Ida Habbestad

Styremedlem Harold Jenssen i Norges Korforbund i Troms hevda i eit innlegg på Ballade sist torsdag at korforbundet sitt årsmøte vart ført bak lyset då 200 000 kroner frå forbundet sentralt vart overført til Barents Internasjonale Korfestival (BICF) i 2007 .

Ifølgje Jenssen var det ved landsmøtet i 2008, i høve rekneskapen for 2007, at ein vart merksame på ei overføring pålydande kr 200 000 til Barents Internasjonale Korfestival. Beløpet skulle bli betalt attende til Norges Korforbund, i fire rater, kvar på kr 50 000 frå 2008. Dette i følgje ein avtale med Tromsø Kommune, skriv Jenssen, som nemner at NK Troms har dokumentert at avtalen ikkje eksisterer.

”Jeg og sikkert flere med meg følte at saksframlegget bevisst var utformet slik for å føre årsmøtedelegatene bak lyset ved å fortie virkeligheten. Hvem har så betalt ut kr. 200.000 fra NK sine penger til BICF, spør Jenssen i innlegget på Ballade.

Dåverande økonomisjef, Sonja Engen, var ansvarleg for overføringa og saksframlegget. Ho er derfor også den som medvite skal ha misleia årsmøtet, dersom Jenssen sine anklagar er rette. Engen fortel til Ballade at det er ho som har betalt ut beløpet. Men ikkje som nokon enkelt sum, og heller ikkje ut i lause lufta.


Enkel sak?
- Denne saken er egentlig ganske enkel. Etter styrets handlingsplan i 2003-2004, ble det vedtatt at man skulle satse på nordområdene. (I handlingsplanen, einstemmig vedteken av landsmøtet, står delmålet ”Utvikle og gjennomføre en sommerkorskole i Barentsregionen” under forbundet sine hovudmål. Under "Internasjonale mål" er det oppført som mål at forbundet aktivt skal bidra til ”opprettelse av samarbeid og utvikling av tiltak i Barentsregionen”, red anm.).

Eitt tiltak kring denne satsinga vart Barents Internasjonale Korfestival. For å få denne opp å gå, forskutterte forbundet midlar til ein person som kunne arbeida med dette. Vedkomande prosjektarbeidar hadde også andre oppgåver for Norges Korforbund.

- Måten man gjorde dette på, var å tilsette en prosjektmedarbeider over tre år. Beløpet det er snakk om, er gått til avlønning, noen ganske få reiseutgifter og små beløp tilknyttet møtevirksomhet rundt dette. Ser man på kostnadene rundt det å ha en tilsatt, er ikke 200 000 spesielt mye over en tre års periode, seier Engen.


Låg tilslutning
Problema oppsto då Barents Internasjonale Korfestival fekk så låg tilslutning at festivalen i 2004 – første året den var forsøkt arrangert – måtte avlysast, og at den året etter, i 2005, berre så vidt gjekk rundt.

Harold Jenssen hevdar at midla skulle betalast attende til korforbundet frå Tromsø Kommune. Til Ballade understrekar Torbjørg Lindquist, som var styret sin representant i interrimsstyret i Barents, at det er Barents Internasjonale Korfestival og ikkje Tromsø kommune som skuldar midlar til forbundet.

Tromsø kommune diskuterte imidlertid, med mellom andre Lindquist, ved eit møte 21. november 2006, moglege løysingar for å bistå festivalen så den kunne leva vidare. Mellom anna såg ein føre seg at festivalen kunne søkja Norges Korforbund om at kravet vart omgjort til eit rentefritt lån med fire års nedbetalingstid. Festivalen kunne i mellomtida søkja stønad til avdraga hjå kommunen.

I følgje kulturkonsulent i Tromsø kommune, Erling Kjeldsen, låg der tydelege føringar bak dette ynskjet, som at festivalsekretariatet skulle vera lokalisert i Tromsø. Dette skjedde ikkje; sekretariatet vart lagt til Narvik, og mellom anna difor vart krava for deltaking ikkje tilfredsstillande for kommunen.


Berømmar forbundet
- Det er synd at hukommelsen til Harold Jenssen er så dårlig at han ikke husker arbeidet med å få i stand Sommerkorskolen og Barents Internasjonale Korfestival i Tromsø i 2004. Jenssen møtte som vara til styret i NK Troms på dette tidspunktet, og han har vært delegat på alle årsmøter i Troms hvor denne saka har vært presentert. Han var den gang ivrig motivator overfor korsangere i Troms for å få de til å delta på disse flotte tiltakene, seier Torbjørg Lindquist.

- Det er også svært synd at løsningene BICF søkte for å betale tilbake lånet ikke lot seg gjennomføre. Jeg ønsker likevel å berømme Norges Korforbund som den gang viste vilje til å satse i Barentsregionen. Men jeg hadde aldri forestilt meg at frivillig innsats over flere år for å skape gode tilbud, skulle belønnes med mistenkeliggjøring og gransking. Og at det faktisk var Harold Jenssen – som virkelig kjenner historia om tiltaket – som fremma forslag om gransking. Hva er det egentlige motivet, spør ho.


Til Jenssen sitt spørsmål om formalia ved ei slik pengeoverføring om ”rekneskapsmessige lovar og forskrifter er i orden og godt forankra i vedtak i sentralstyret”, svarer Engen at ho meiner administrasjonen har opptredd korrekt.


- Styret vedtok jo satsningen i 2003-2004. Og utbetalingene er ikke på noen måte forsøkt skjult i regnskapet. Beløpet har stått som en fordring på Barents i flere år. Det har heller ikke vært lagt skjult på at prosjektmedarbeideren jobbet for oss: Personen var i vårt kontorfelleskap og jobbet der underveis. Styret og landsmøtet har godkjent disse budsjettene år etter år, og bet seg ikke merke i det før i 2008. Da ble det forklart hvordan dette lå an.


Ser fram til granskning
Engen seiar at ho ser fram til at granskinga kjem igong.

- Jeg har tatt ut dette avdelingsregnskapet og levert til presidenten, samt et eksemplar til den ene personen i granskningskommiteen, som gav beskjed om at han hadde mottatt det. Etter dette har jeg ikke hørt noe mer. Men jeg ser fram til granskningen, så vi kanskje kan få påstandene ut av verden. Det er typisk at det blir stille når saken kan gjøres noe med, seier Engen til Ballade.

Ballade kontakta Norges Korforbund fredag for å få tilgang til rekneskapet for 2007 samt rekneskapsrapporten som Harold Jenssen nemner. Korforbundet har så langt ikkje sendt over desse dokumenta.


Saken:
I 2009 har sju personar frå Norges Korforbund sin administrasjon og styre trukket seg frå verva sine i protest mot måten forbundet vert leia. President Svend-Ola Hådi hevdar at oppseiingane er tekne på alvor og at arbeidsmiljøet i forbundet er godt.

Debatten går no på Ballade om prosessane fram mot dei ulike oppseiingane har gått ordentleg føre seg og i kva grad tidligare og framtidige prosessar i forbundet skjer på ein demokratisk måte.

Kommentarer:

Kom gjerne med informasjon, argumenter og synspunkter. Du kan enten kommentere via din Facebook-profil, eller, om du ikke har det, via vårt lokale kommentarsystem. Vi krever uansett at du underskriver med fullt navn. Alle kommentarer må godkjennes av redaksjonen før de offentliggjøres (mer om Ballades kommentarsystem). På forhånd takk!