MIC / Ballade artikkel
Utskrift fra mic.no / ballade.no



Provoserande minimalisme?

Publisert: 05/27/2008 av Ida Habbestad

http://www.ballade.no/nmi.nsf/doc/art2008052709112987851682

KONSERTMELDING: Urframføringa av Ricardas Kabelis nye verk hadde ei fascinerande påverknad på publikum. ”Gjennom forløpet breidte det seg ei tiltakande uro mellom tilskodarane, og eg er overtydd om at me var fleire som lenge reflekterte over alt anna enn musikken; tanken krinsa kring vonde stolar, kviskrande damer på raden bak, mi eiga etterkvart ubendige rastløyse”, skriv Ballades utsende om konserten.

Ricardas Kabelis/Foto: Arunas Baltënas (370x447)



Av Ida Habbestad

Første konsert i serien ”Nytt fra Norden” besto av to tredelar Beethoven pluss ein del ny musikk av Racardas Kabelis.

Dette skeive blandingsforholdet var til å undrast over, særleg sidan Kabelis’ namn var overskrift på konsertprogrammet. Men sidan verket åt sistnemnde gjorde mykje av seg, var det kanskje med hensikt at verk frå kjernerepertoaret sto før og etter – under overskrifta av det nye.



Gåtefull og minimal


Litauiske Ricardas Kabelis er ukjend for mange i Noreg, men vart i festspelprogrammet introdusert som ein av dei mest radikale og gåtefulle skikkelsar i sitt lands musikkliv.

”Hvordan takler han oppgaven å skrive en komposisjon for de tradisjonstunge mediene hardingfele og strykekvartett?” spurte artikkelforfattaren i presentasjonen av han, og svaret er kanskje: Med total opposisjon mot tradisjonelle forventningar.


For som andre komposisjonar av Kabelis, der framhevinga av eitt musikalsk parameter (og utelukkinga av dei øvrige) står sentralt, hadde også dette verket eit minimalistisk utgangspunkt. Enkle akkordar, repetert med små variasjonar og med korte pauser mellom, er raskt oppsummert kva Engegårdkvartetten og Nils Økland fekk å bryna seg på.



Nothing to say


’Cage-liknande’, kunne ein tenkja om Kabelis’ verk. Fritt for nokon openbar progresjon eller dramaturgi, var assosiasjonen der til det kjende utsegnet: ”I have nothing to say, and I am saying it (and that is poetry)”. I dette tilfellet kunne ein kanskje lete Kabelis seia: ”I have nothing to say and I am saying it – over and over”.

Som i Cages ”4’33” – spora me dessutan den største (og kanskje eigentlege?) utviklinga ute i salen. Gjennom forløpet breidte det seg ei tiltakande uro mellom tilskodarane, og eg er overtydd om at me var fleire som lenge reflekterte over alt anna enn musikken; tanken krinsa kring vonde stolar, kviskrande damer på raden bak, mi eiga etterkvart ubendige rastløyse – som i dette tilfellet hadde eitt mogleg utfall: å lata att augo, freista stengja alt dette andre ute.



Misbruk av hardingfela?


Og me lot oss så gjerne provosera; av Kabelis fråverande forsøk på å meddela, og endå meir av hans nærast meiningslause bruk av hardingfela. Den hadde eit einaste enkelt oktavsprang å framføra, klimpra nedanfrå og opp, igjen og igjen.


For ein nordmann er dette uhøyrt. Kvifor nytta Kabelis ei hardingfele slik? Skulle han ikkje la seg inspirera av understrengane, av den særeigne klangen? Kvifor kasta vekk ressursar ved å invitera ein storleik som Nils Økland til å klimpra eit enkelt intervall?



Uortodoks provokasjon


Denne forma for provokasjon virka fascinerande i ei tid der me går mann av huse for å få med oss alle dei heftige verkemiddel i Calixto Bieitos ”Brand”.

Hjå Bieito er overgrep, narkovrak, munnsex, avkutta tunger og alle slags kroppsvæsker ein sjølvsagt del av uttrykket. Kabelis’ nye verk rørde ikkje ved slike tabubelagte grenser; provokasjonen låg i noko anna. Musikken underheldt oss ikkje, den hadde ikkje noko på hjarta, men overlot til oss å tenkja sjølve – på ingenting.


Dét likte me dårlig. Me ville reisa oss og gå (men turde det ikkje), og reagerte med høfleg distansert applaus då komponisten kom opp for å få sin blomekvast.

Men var det dermed eit dårleg verk?

Etter denne første framføringa, er ikkje dét godt å seia. Uansett må det ha vore ei kraftanstrenging for musikarane, som med sitt statiske forløp og urolege publikum gjennomførte med imponerande vilje og ro.



Kva provoserer mest?


Så er det kanskje ikkje så rart at Engegårdkvartetten avslutta med ein Beethoven som var kaotisk og lite polert; og der ensemblets frontfigur i forsøket på å formidla det ytterste, nok bikka over frå det energiske mot det ukontrollerte.


Konsentrasjonen heldt ikkje til siste slutt – og inntrykket av at profesjonaliteten slapp tak ved vegs ende vart forsterka ved introduksjonen til første ekstranummer. ”Nå skal vi spille litt mer finsk samtidsmusikk, hehe”, sa andrefiolinisten. Spøkefullt sjølvsagt; for heldigvis slapp me meir av det ubehagelege, og fekk servert smektande tango i staden.

Same kor uskuldig dette utsegnet var, låg innbakt i det ei avstandstaken frå verket som tidlegare var urframført. Den imponerande respekten som musikarane hadde synt vart forsiktig prella vekk. Dei spende bein på si eiga, bunnseriøse framføring, og styrka vår mistanke: Dette var ikkje eit verk som held mål.

Men kan ein konkludera så enkelt? Veit me nok om Kabelis verk etter ein gongs gjennomlytting til å slenga det i haugen av ikkje interessant musikk?


Eg er som sagt ikkje sikker.

Men då me nokre augeblikk etter, lettare til sinns forlot Håkonshallen, var det uansett med ei underleg kjensle av at utøvarane heller fridde til oss enn til si eiga opptreden.


Nytt fra Norden - Ricardas Kabelis

Med Engegårdkvartetten og Nils Økland

Verk av Beethoven og Kabelis

 

Relaterte bedrifter:

Festspillene i Bergen (Festivaler\Klassisk musikk; Festivaler\Mai)

Relaterte personer:

Atle Sponberg, Fiolinist, Konsertmester

Arvid Engegård, Dirigent, Fiolinist, Hardingfelespiller

Relaterte artikler:

26.05.2008 INTRO-vinnerne kåret

26.05.2008 Veneziansk speleglede

23.05.2008 INTRO-musikar Anders Nilsson: -Om en musiker kan holde på med det han vil, har han lykkes

22.05.2008 FiB: Kjærleiken i mange lag

21.05.2008 Seminar om musikkensemblefeltet

19.05.2008 Nordic Voices med ny plate og konsert under Festspillene i Bergen

19.05.2008 Festspillene i Bergen - OiOi-programmet

01.04.2008 Forlenget kontrakt for Per Boye Hansen

14.01.2009 Festspillprogrammet er lansert

27.06.2008 Festspillene i Bergen - Økning i billettsalg

05.06.2008 Flere gjensyn med gamle utøvere

02.06.2008 På rutinen?

29.05.2008 God øving kan gjøre underverker!

28.05.2008 Kvalitativt intermezzo

MIC Norsk musikkinformasjon
Postboks 2674 Solli
0203 Oslo
Tel: 2327 6300
Fax: 2327 6301
info@mic.no